വാഷിംഗ്ടൺ: ഇറാനിലെ സൈനിക ദൗത്യം ഉടൻ പൂർത്തിയാകുമെന്ന് പ്രഖ്യാപിച്ച് അമേരിക്കൻ പ്രസിഡന്റ് ഡോണാൾഡ് ട്രംപ്. വൈറ്റ് ഹൗസിൽ നിന്ന് രാജ്യത്തെ അഭിസംബോധന ചെയ്യവെയാണ് ‘ഓപ്പറേഷൻ എപ്പിക് ഫ്യൂറി’ (Operation Epic Fury) ലക്ഷ്യത്തിനടുത്താണെന്ന് അദ്ദേഹം അവകാശപ്പെട്ടത്. അടുത്ത രണ്ട് മുതൽ മൂന്ന് ആഴ്ചയ്ക്കുള്ളിൽ ഇറാനെതിരെ അതിശക്തമായ ആക്രമണങ്ങൾ ഉണ്ടാകുമെന്നും ട്രംപ് മുന്നറിയിപ്പ് നൽകി.
കഴിഞ്ഞ 32 ദിവസമായി തുടരുന്ന യുദ്ധത്തിലൂടെ ഇറാന്റെ സൈനിക ശേഷി തകർത്തതായും വരും ആഴ്ചകളിൽ ദൗത്യം പൂർത്തിയാകുമെന്നും ട്രംപ് പറഞ്ഞു. ലോകമഹായുദ്ധങ്ങൾ വർഷങ്ങളോളം നീണ്ടപ്പോൾ തന്റെ സൈനിക നീക്കം ആഴ്ചകൾക്കുള്ളിൽ ഫലം കണ്ടുവെന്ന് അദ്ദേഹം അവകാശപ്പെട്ടു.
ഇറാൻ ഭരണകൂടം ചർച്ചകൾക്ക് തയ്യാറായില്ലെങ്കിൽ രാജ്യത്തെ മുഴുവൻ വൈദ്യുത നിലയങ്ങളും എണ്ണ ഉത്പാദന കേന്ദ്രങ്ങളും തകർക്കുമെന്ന് ട്രംപ് ഭീഷണിപ്പെടുത്തി. “അവരെ ശിലായുഗത്തിലേക്ക് ഞങ്ങൾ മടക്കി അയക്കും,” ട്രംപ് പറഞ്ഞു.
ഇറാനിലെ പഴയ ഭരണനേതൃത്വം കൊല്ലപ്പെട്ടതായും പുതിയ നേതൃത്വം കൂടുതൽ വിവേകത്തോടെ പെരുമാറുന്നുവെന്നും ട്രംപ് അവകാശപ്പെട്ടു. ഭരണകൂടത്തെ മാറ്റുക എന്നത് തന്റെ ലക്ഷ്യമായിരുന്നില്ലെന്നും എന്നാൽ അത് സംഭവിച്ചതായും അദ്ദേഹം കൂട്ടിച്ചേർത്തു.
അമേരിക്കയിൽ ഇന്ധനവില വർദ്ധിക്കാൻ കാരണം ഇറാന്റെ ‘ഭ്രാന്തൻ ഭീകരാക്രമണങ്ങൾ’ ആണെന്ന് ട്രംപ് കുറ്റപ്പെടുത്തി. ഹോർമുസ് കടലിടുക്കിന്റെ (Strait of Hormuz) നിയന്ത്രണം മറ്റ് രാജ്യങ്ങൾ ഏറ്റെടുക്കണമെന്നും അദ്ദേഹം ആവശ്യപ്പെട്ടു.ഹോർമുസ് കടലിടുക്ക് തുറക്കാൻ സഹായിക്കാത്ത പക്ഷം നാറ്റോ (NATO) സഖ്യത്തിൽ നിന്ന് പിന്മാറുന്ന കാര്യം ഗൗരവമായി പരിഗണിക്കുന്നുണ്ടെന്നും ട്രംപ് സൂചിപ്പിച്ചു.
യുദ്ധത്തിൽ ജീവൻ വെടിഞ്ഞ 13 അമേരിക്കൻ സൈനികരെ ട്രംപ് ആദരിച്ചു. എന്നാൽ, യുദ്ധം അനാവശ്യമാണെന്നും ഇന്ധനവില വർദ്ധനവ് ജനജീവിതത്തെ ബാധിക്കുന്നുവെന്നും കാണിച്ച് ഭൂരിഭാഗം അമേരിക്കക്കാരും യുദ്ധത്തിനെതിരെ രംഗത്തുണ്ടെന്നാണ് സർവ്വേകൾ സൂചിപ്പിക്കുന്നത്.
