ബംഗളുരു: മൈ ചർച്ച് ആസ്ഥാനമന്ദിരമായ ആശ്രയ കേന്ദ്രത്തിന്റെ സമർപ്പണത്തോടെ
കർണാടകത്തിൽ കൂടുതൽ വിപുലമായ ജീവകാരുണ്യ പ്രവർത്തനങ്ങൾക്കും സേവന പദ്ധതികൾക്കും തുടക്കമായി. ബംഗളുരു ഇലക്ട്രോണിക് സിറ്റിക്കു സമീപം ചന്ദപുരയിലെ ഗീലേജിൽ സജ്ജീകരിച്ച ആശ്രയകേന്ദ്രത്തിന്റെ സമർപ്പണവും ഉദ്ഘാടനവും മൈ ചർച്ച് സ്ഥാപകൻ എ.വി. തോമസ് നിർവഹിച്ചു.
ഇക്കഴിഞ്ഞ ഞായറാഴ്ച വൈകിട്ട് ആറിന് ആശ്രയകേന്ദ്രത്തിൽ സംഘടിപ്പിച്ച പ്രൗ‍‍‍‍ഢമായ സമർപ്പണ ചടങ്ങിന് രാഹുൽ, സ്നേഹ എന്നിവരുടെ നേതൃത്വത്തിലുള്ള ക്വയർസംഘം ആലപിച്ച പ്രാർത്ഥാഗാനത്തോടെ തുടക്കമായി. പ്രൊഫ. ജേക്കബ് വർഗീസ് സ്വാഗതം ആശംസിച്ചു. മുൻ വ്യോമസേനാ ഉദ്യോഗസ്ഥനും വ്യവസായിയുമായ താൻ എങ്ങനെ ഇവാൻജലിസ്റ്റ് ആയി മാറിയെന്നും, ലോകമെമ്പാടുമായി ചിതറിക്കിടക്കുന്ന എണ്ണമറ്റ ക്രൈസ്തവ സഭകളിലെ വിശ്വാസികൾ ഒരേയൊരു ഇടയനു കീഴിൽ ഒരൊറ്റ ആട്ടിൻപറ്റമായി മാറേണ്ടതിന്റെ ആവശ്യകതയെക്കുറിച്ചും സ്വന്തം ജീവിതാനുഭവങ്ങളെ ആധാരമാക്കി എ.വി. തോമസ് ആശ്രയകേന്ദ്ര സമർപ്പണ പ്രഭാഷണത്തിൽ സംസാരിച്ചു.
ആശ്രയകേന്ദ്രത്തിന്റെ രൂപകല്പനയും നിർമ്മാണപ്രവൃത്തിയും നിർവഹിച്ച പുനീത് ഗൗഡ, നിർമ്മാണ പ്രവർത്തനങ്ങളുടെ ഏകോപനം നിർവഹിച്ച ജിനുമോൻ, പ്രൊഫ. ജേക്കബ് വർഗീസ് എന്നിവരെ എ.വി. തോമസ് ഉപഹാരങ്ങൾ നല്കി ആദരിച്ചു. കർണാടകത്തിൽ മൈ ചർച്ച് നടപ്പാക്കുന്ന വിവിധ വിദ്യാഭ്യാസ, ജീവകാരുണ്യ പദ്ധതികളുടെയും, ജീവൻരക്ഷാ പ്രവർത്തനങ്ങളുടെയും, അനുബന്ധ പരിപാടികളുടെയും ഏകോപനം വരുംദിവസങ്ങളിൽ ആശ്രയകേന്ദ്രത്തിലൂടെയായിരിക്കും നിർവഹിക്കപ്പെടുകയെന്ന് മൈ ചർച്ച് വക്താവ് സുനിൽ മാത്യു പറഞ്ഞു. മൈ ചർച്ചിനെക്കുറിച്ചും ആശ്രയകേന്ദ്രത്തെക്കുറിച്ചും കൂടുതൽ വിവരങ്ങൾക്ക് 97461 14444 എന്ന ഫോൺ നമ്പറിൽ വിളിക്കാം.
