സ്നാപകനായ യോഹന്നാൻ ബൈബിളിലെ അത്യന്തം അസാധാരണ വ്യക്തികളിൽ ഒരാളാണ്. അദ്ദേഹം രാജാവോ, പുരോഹിതനോ, സൈനിക നേതാവോ ആയിരുന്നില്ല. എന്നിരുന്നാലും, യേശു അവനെ സ്ത്രീകളിൽ ജനിച്ചവരിൽ ഏറ്റവും മഹാനെന്ന് വിശേഷിപ്പിച്ചു (മത്തായി 11:11). അദ്ദേഹത്തിന്റെ ജീവിതം, സന്ദേശം, ധൈര്യം, വിനയം — ഇന്നത്തെ വിശ്വാസികൾക്കായി കാലാതീതമായ പാഠങ്ങൾ നൽകുന്നു.
1. ഓരോ ജീവനെക്കുറിച്ചും ദൈവത്തിന് ഒരു ഉദ്ദേശ്യമുണ്ട്
യോഹന്നാന്റെ ജീവിതം അവൻ ജനിക്കുന്നതിനു മുമ്പേ ദൈവം പദ്ധതിയിട്ടിരുന്നു.
ജനനം മുതൽ തന്നെ പരിശുദ്ധാത്മാവ് നിറഞ്ഞവനായി അവൻ ജനത്തെ കർത്താവിങ്കലേക്കു നയിക്കും എന്ന് ഗബ്രിയേൽ ദൂതൻ സെഖര്യാവിനോട് പറയുന്നുണ്ട്.
(ലൂക്കാ 1:13–17). അവന്റെ ജനനം മാതാപിതാക്കൾക്കു മാത്രമല്ല, പലർക്കും സന്തോഷത്തിന് കാരണമായി. ദൈവം ഓരോ മനുഷ്യനെയും വ്യക്തവും വ്യത്യസ്തവുമായ ഉദ്ദേശ്യത്തോടു കൂടിയാണ് സൃഷ്ടിക്കുന്നത് എന്ന് ഇതിനാൽ മനസ്സിലാക്കാം. നമ്മുടെ വിളി ഉടൻ നമുക്ക് തിരിച്ചറിയുവാൻ കഴിഞ്ഞില്ലെങ്കിലും അനുസരണയോടെ ജീവിക്കുമ്പോൾ, പ്രവർത്തിക്കുമ്പോൾ ദൈവത്തിന്റെ പദ്ധതി വെളിപ്പെടും.
2. ലളിതമായ ജീവിതം നയിക്കുക
യോഹന്നാൻ സുഖസൗകര്യങ്ങളിൽ നിന്ന് ദൂരെയുള്ള ജീവിതം തിരഞ്ഞെടുത്തു. അവൻ മരുഭൂമിയിൽ പാർത്തു, ഒട്ടകത്തിന്റെ രോമംകൊണ്ടുള്ള വസ്ത്രം ധരിച്ചു, വെട്ടുകിളികളും കാട്ടുതേനും ഭക്ഷിച്ചു (മത്തായി 3:4). ഈ ലാളിത്യം അവനെ ലൗകീക ശ്രദ്ധചിതറലുകളിൽ നിന്ന് രക്ഷിച്ചു. ഇന്നത്തെ ഭൗതീകാത്മക ലോകത്ത്, ആത്മീയ ശക്തി വസ്തുക്കളിൽ നിന്ന് അല്ല, ദൈവത്തോടുള്ള സമർപ്പണത്തിൽ നിന്നാണ് വരുന്നത് എന്നത് യോഹന്നാൻ പഠിപ്പിക്കുന്നു. ദൈവം ഉപയോഗിക്കുവാൻ തുടങ്ങിക്കഴിയുമ്പോൾ സുഖലോലുപതയിലേക്കും ആഡംബരത്തിലേക്കും തിരിയുന്ന വേലക്കാർക്ക് യോഹന്നാൻ ഒരു മാതൃകയാണ്.
3. സത്യം ധൈര്യത്തോടെ പറയുക
യോഹന്നാൻ ഒരു ഭയവും കൂടാതെ പാപത്തിനെതിരെ തുറന്ന യുദ്ധം നടത്തി. അവന്റെ പ്രസംഗങ്ങൾ പാപത്തിനെതിരെ ആയിരുന്നു. പരീശന്മാരെയും സദ്ദൂക്ക്യരെയും “സർപ്പസന്തതി” എന്ന് വിളിച്ച്, മാനസാന്തരത്തിന് യോജിച്ച ഫലം കാണിക്കണമെന്ന് മുന്നറിയിപ്പ് നൽകി. (മത്തായി 3:7–10). അംഗീകാരം നേടാൻ അദ്ദേഹം സന്ദേശം മൃദുവാക്കിയില്ല, മനുഷ്യർക്ക് ആസ്വാദ്യകരമാക്കിയില്ല. ദൈവത്തോടുള്ള പ്രതിബദ്ധതയാണ് അദ്ദേഹത്തിന്റെ ധൈര്യത്തിന്റെ ഉറവിടം. സത്യം പറയുന്നതിനാൽ ദോഷം വന്നാലും, ധൈര്യത്തോടെ സത്യം പറയേണ്ടതിന്റെ ഉദാഹരണമാണ് യോഹന്നാൻ.
4. മാറ്റത്തിന്റെ ആരംഭം മാനസാന്തരമാണ്
യോഹന്നാന്റെ പ്രധാന സന്ദേശം: “മാനസാന്തരപ്പെടുക; സ്വർഗ്ഗരാജ്യം സമീപിച്ചിരിക്കുന്നു” എന്നതായിരുന്നു. (മത്തായി 3:2). പാപത്തിൽ നിന്ന് വഴിത്തിരിഞ്ഞു പോകുവാനുള്ള തീരുമാനത്തിന്റെ പ്രഖ്യാപനമായിരുന്നു അദ്ദേഹം അനുശാസിച്ച സ്നാനം. വാക്കുകളിൽ മാത്രം അല്ല, പ്രവൃത്തികളിലൂടെ തെളിയിക്കുന്ന മാനസാന്തരമാണ് യഥാർത്ഥമെന്ന് അദ്ദേഹം പഠിപ്പിച്ചു. (ലൂക്കാ 3:8–14). ശരിയായ മാറ്റം തെറ്റ് തിരിച്ചറിഞ്ഞ്, ക്ഷമ പ്രാപിച്ച്, ജീവിതം തിരുത്തുമ്പോഴാണ് ആരംഭിക്കുന്നത്.
5. മറ്റുള്ളവർക്കായി വഴി ഒരുക്കുക
വെറുമൊരു മുൻഗാമിയുടെയും വഴികാട്ടിയുടെയും സ്ഥാനം കൊണ്ട് യോഹന്നാൻ തൃപ്തനായിരുന്നു. “മരുഭൂമിയിൽ വിളിച്ചുപറയുന്നവന്റെ ശബ്ദം” മാത്രമാണ് താൻ എന്ന് യോഹന്നാൻ പറഞ്ഞു. (യെശയ്യാ 40:3; യോഹന്നാൻ 1:23). അവന്റെ ശുശ്രൂഷ സ്വന്തം മഹത്വത്തിനല്ല, യേശുവിനെ സ്വീകരിക്കാൻ ജനത്തിന്റെ ഹൃദയങ്ങളെ തയ്യാറാക്കുന്നതിനായിരുന്നു. നമ്മുടെ ജീവിതത്തിന്റെ ഒരു പ്രധാന ലക്ഷ്യം മറ്റുള്ളവരെ ദൈവത്തിലേക്ക് നയിക്കുന്നതാണെന്ന് യോഹന്നാന്റെ ജീവിതം നമ്മെ പഠിപ്പിക്കുന്നു.
6. വിനയം അഭ്യസിക്കുക
വലിയ ജനക്കൂട്ടങ്ങൾ യോഹന്നാനെ പിന്തുടർന്നെങ്കിലും, അവൻ മഹത്വം അവകാശപ്പെട്ടില്ല. വേണമെങ്കിൽ അവനൊരു നേതാവാകാമായിരുന്നു. പക്ഷെ താൻ ക്രിസ്തുവല്ലെന്ന് ജനത്തോടു വ്യക്തമായി പറഞ്ഞു. (യോഹന്നാൻ 1:20), യേശുവിന്റെ ചെരിപ്പ് പോലും ചുമക്കാൻ താൻ യോഗ്യനല്ലെന്ന് സമ്മതിച്ചു. (മത്തായി 3:11). സ്വയംപ്രചാരണത്തെ പ്രോത്സാഹിപ്പിക്കുന്ന ഈ ലോകത്ത്, ദൈവസന്നിധിയിൽ സ്വന്തം സ്ഥാനം തിരിച്ചറിയുന്ന വിനയമാണ് യഥാർത്ഥ മഹത്വമെന്ന് യോഹന്നാൻ കാണിക്കുന്നു.
7. ആളുകളെ നമ്മുടെ അടുക്കൽ അല്ല, യേശുവിന്റെ അടുക്കലേക്കു നയിക്കുക
യേശുവിനെ കണ്ടപ്പോൾ, യോഹന്നാൻ പ്രഖ്യാപിച്ചു: “ഇതാ ലോകത്തിന്റെ പാപം നീക്കുന്ന ദൈവത്തിന്റെ കുഞ്ഞാടു!” (യോഹന്നാൻ 1:29). തന്റെ അനുയായികളെ യേശുവിലേക്ക് യോഹന്നാൻ നയിച്ചു. മനുഷ്യപ്രശസ്തിയിലേക്കല്ല, ക്രിസ്തുവിലേക്കാണ് യഥാർത്ഥ ശുശ്രൂഷ നയിക്കേണ്ടത് എന്നത് ഇതിലൂടെ വ്യക്തമാകുന്നു. എന്റെ അടുക്കൽ ആളുകൾ വന്നു കൂടണമെന്നു ആഗ്രഹിക്കുന്ന ആളുകളുടെ ഈ ലോകത്തു യോഹന്നാൻ നമുക്കൊരു മാതൃകയാണ്.
8. ജനപ്രിയത കുറയുമ്പോഴും വിശ്വസ്തരായി നിലനിൽക്കുക
യേശുവിന്റെ ശുശ്രൂഷ വളരുമ്പോൾ, യോഹന്നാന്റെ സ്വാധീനം കുറഞ്ഞു. ഒരു കാലത്തു തന്റെ ചുറ്റും കൂടിയിരുന്ന ജനം പിന്നീട് യേശുവിന്റെ പിറകെ പോയപ്പോൾ, അസൂയപ്പെടാതെ, അദ്ദേഹം സന്തോഷത്തോടെ പറഞ്ഞു: “അവൻ വളരേണം; ഞാൻ കുറയേണം” (യോഹന്നാൻ 3:30). ദൈവരാജ്യത്തിലെ വിജയം സ്വയപ്രശസ്തിയിൽ അല്ല, ദൈവത്തിന്റെ ഉദ്ദേശ്യം നിറവേറ്റുന്നതിലാണ് എന്ന് ഇത് കാണിക്കുന്നു.
9. വില കൊടുത്താലും നീതിക്കായി നിലകൊള്ളുക
യോഹന്നാൻ രാജാവായ ഹെരോദാവിനെ അവന്റെ പാപപരമായ വിവാഹത്തെക്കുറിച്ച് കുറ്റപ്പെടുത്തി (മർക്കോസ് 6:17–18). അതിന്റെ ഫലമായി അദ്ദേഹം തടവിലായി. അപകടം അറിയാമായിരുന്നിട്ടും, നീതിക്കു വിട്ടുവീഴ്ച ചെയ്യാൻ അദ്ദേഹം തയ്യാറായില്ല. ദൈവത്തെ അനുസരിക്കുന്നത് ചിലപ്പോൾ കഷ്ടതകൾ ഉണ്ടാക്കുമെങ്കിലും, സത്യത്തിന്റെ കാര്യത്തിൽ വിട്ടുവീഴ്ച ചെയ്യരുത്.
10. ദീർഘായുസ്സല്ല, വിശ്വസ്തതയാണ് പ്രധാനപ്പെട്ടത്
യോഹന്നാന് ദീർഘായുസ് ലഭിച്ചില്ല. വാർദ്ധക്യത്തിലെ മാതാപിതാക്കളെ സംരക്ഷിക്കുവാൻ അവനു കഴിഞ്ഞില്ല. ലോകത്തിന്റെ കണ്ണിൽ അവന്റെ ജീവിതം ഒരു പരാജയമായിരുന്നു. യോഹന്നാന്റെ ജീവിതം തടവറയിൽ അവസാനിച്ചു; ഹെരോദാവ് അവനെ കൊല്ലിച്ചു.(മർക്കോസ് 6:27–29). ലോകത്തിന്റെ കാഴ്ചയിൽ അത് ദുരന്തമായിരുന്നുവെങ്കിലും, യേശു അവനെ മഹാനെന്ന് വിളിച്ചു (മത്തായി 11:11). നീണ്ട ജീവിതമല്ല, അർത്ഥപൂർണവും ഉദ്ദേശ്യമുള്ളതുമായ ഒരു ജീവിതമാണ് ദൈവം ആഗ്രഹിക്കുന്നത്.
സ്നാപകനായ യോഹന്നാന്റെ ജീവിതം ഉദ്ദേശ്യം, ലാളിത്യം, ധൈര്യം, വിനയം, വിശ്വസ്തത എന്നിവയുടെ മാതൃകയാണ്. യേശുവിനായി വഴി ഒരുക്കി, സത്യം ഭയമില്ലാതെ പ്രസംഗിച്ചു, മരണം വരെ തന്റെ ദൗത്യത്തിൽ ഉറച്ചുനിന്നു. ലോകമാന്യതയ്ക്കല്ല, ദൈവവിളിക്കായി ജീവിക്കാൻ അവന്റെ ജീവിതം നമ്മെ വെല്ലുവിളിക്കുന്നു.
