കുമ്പനാട്: ഇരുളടഞ്ഞ ലോകത്തിന് പ്രകാശവും പ്രത്യാശയും പകർന്നു നൽകാൻ വിശ്വാസ സമൂഹം തയ്യാറാകണമെന്ന ആഹ്വാനത്തോടെ ഇൻഡ്യാ പെന്തക്കോസ്ത് ദൈവസഭ 102-ാമത് ജനറൽ കൺവൻ ആയിരങ്ങൾ പങ്കെടുത്ത കത്തൃമേശയോടും പൊതുയോഗത്തോടുംകൂടി സമാപിച്ചു.
ജനറൽ സെക്രട്ടറി പാസ്റ്റർ ബേബി വർഗിസിൻ്റെ അധ്യക്ഷതയിൽ കൂടിയ സമാപന യോഗത്തിൽ തോമസ് ജോർജ് പ്രസംഗിച്ചു. ജനറൽ പ്രസിഡൻ്റ് പാസ്റ്റർ വൽസൺ ഏബ്രഹാം സമാപന സന്ദേശം നൽകി.
11 ന് വൈകിട്ട് 5 .30 ന് ആരംഭിച്ച കൺവൻഷൻ്റെ രാത്രിയോഗങ്ങളിൽ പാസ്റ്റർമാരായ വി ജെ തോമസ് രാജു ആനിക്കാട്, നൂറുദീൻ മുള്ള, സണ്ണി ഫിലിപ്പ്, മോനിസ് ജോർജി, കുഞപ്പൻ സി വർഗീസ്, ബാബു ചെറിയാൻ, രാജു മേത്രയിൽ, കെ ജെ തോമസ്, ജെയിംസ് ജോർജ്, തോമസ് ഫിലിപ്പ്, ജോൺ കെ മാത്യു, സണ്ണി കുര്യൻ, വർഗീസ് മത്തായി, വിൽസൺ ജോസഫ്, ഫിലിപ്പ് പി തോമസ്, ബേബി വർഗീസ് എന്നിവർ പ്രസംച്ചു.
കൺവൻഷനോടന്നുബന്ധിച്ച് സുവിശേഷയോഗം, ബൈബിൾ ക്ലാസ്, പൊതുയോഗം, യൂത്ത് ചലഞ്ച്, മിഷനറി സമ്മേളനം, വിമൻസ് ഫെലോഷിപ്പ് വാർഷികം, സണ്ടേസ്കൂൾ യുവജന സമ്മേളനം, മ്യൂസിക് പ്രോഗ്രാം, ഹിന്ദി മീറ്റിംഗുകൾ എന്നിവ നടന്നു. സ്റ്റാൻലി ജോണിൻ്റെ നേതൃത്വത്തിലുള്ള ക്വയർ ഗാനശുശ്രുഷക്ക് നേതൃത്വം നൽകി . ആരാധന, പ്രവൃത്തി, സാക്ഷീകരണം എന്നതായിരുന്നു ഈ വർഷത്തെ കൺവൻഷൻ്റെ ചിന്താവിഷയം.
ഷിബിൻ ഗിലായാദിൻ്റെ നേതൃത്വത്തിലുള്ള ഗിലയാദ് ഈവൻ്റസ് രുചികരമായ ഭക്ഷണം നൽകി. എടുത്തു പറയത്തക്ക പരാതികൾ ഇല്ലാതെയാണ് ഈ വർഷത്തെ കൺവൻഷന് തിരശ്ശില വീണത്.
ഇൻഡ്യയുടെ വിവിധ സംസ്ഥാനങ്ങളിൽ നിന്നും അമേരിക്ക, ഗൾഫ് രാജ്യങ്ങൾ , യുകെ, അയർലൻ്റ്, ആസ്ട്രേലിയ എന്നി രാജ്യങ്ങളിൽ നിന്നുള്ള ആയിരക്കണക്കിന് ശുശ്രുഷകൻമാരും വിശ്വാസികളും യോഗങ്ങളിൽ പങ്കെടുത്തു.
ആദ്യദിവസങ്ങളിൽ ജനപങ്കാളിത്തം കുറവായിരുന്നെങ്കിലും എല്ലാ ദുഷ്പ്രചരണങ്ങളേയും മറികടന്ന് ജനങ്ങൾ ഒഴുകിയെത്തി. കൺവൻഷനെതിരെ ചിലർ സാമൂഹ്യമാധ്യമങ്ങളിലൂടെ ദുഷ്ടലാക്കോടെ നടത്തിയ ദുഷ്പ്രചരണങ്ങൾ വിശ്വാസ സമൂഹം തള്ളിക്കളയുയായിരുന്നു. വിഭാഗിയത വെടിഞ്ഞ് ഐക്യത്തോടെ സഭയെ നയിക്കുവാൻ നേതൃത്വം തയ്യാറാകണമെന്നാണ് വിശ്വാസ സമൂഹത്തിൻ്റെ ആഗ്രഹം.
ജനറൽ കൗൺസിൽ ഭാരാഹികളായ പാസ്റ്റർ വൽസൺ ഏബ്രഹാം(പ്രസിഡൻ്റ്), പാസ്റ്റർ ഫിലിപ്പ് പി തോമസ്(വൈസ് പ്രസിഡൻ്റ്), പാസ്റ്റർ ബേബി വർഗീസ്(ജനറൽ സെക്രട്ടറി), പാസ്റ്റർ തോമസ് ജോർജ്, ബ്രദർ വർക്കി ഏബ്രഹാം കാച്ചാണത്ത്(ജോ.സെക്രട്ടറിമാർ), ബ്രദർ ജോൺ ജോസഫ്(ട്രഷറാർ) എന്നിവർ നേതൃത്വം നൽകി.
