ബെംഗളുരു: എക്കാലത്തും മധുരം ചോരാതെ സംഗീതാസ്വാദകർ മനസിൽ സൂക്ഷിക്കുന്ന നിത്യഹരിത ക്രൈസ്തവ ഭക്തിഗാനങ്ങളുടെ ആലാപന വിസ്‌മയത്തിനായി ബെംഗളൂരുവിൽ അരങ്ങൊരുങ്ങുന്നു. ക്രൈസ്തവ വിശ്വാസികളുടെ കൂട്ടായ്മ‌യായ “മൈ ചർച്ചി”ന്റെ ആഭിമുഖ്യത്തിൽ സംഘടിപ്പിക്കുന്ന “രക്ഷകന്റെ ഗീതം”- സംഗീത സംഗമത്തിന് ജൂൺ ഏഴ് ഞായറാഴ്ച വൈകിട്ട് ആറിന് ഹെന്നൂർ ക്യാമ്പസ് ക്രൂസേഡ് ഹാൾ വേദിയാകും. ക്രൈസ്തവ ഭക്തിഗാനങ്ങൾക്ക് സങ്കീർത്തനങ്ങളുടെ സ്വരസുഗന്ധം പകർന്ന പ്രശസ്ത പിന്നണി ഗായകൻ കെ.ജി. മാർക്കോസിന്റെ നേതൃത്വത്തിൽ പ്രമുഖ യുവഗായകരും പങ്കെടുക്കുന്നു.
ക്രൈസ്തവ ഭക്തിഗാന ശാഖയിലെ മഹാപ്രതിഭകളായ മഹാകവി കെ.വി. സൈമൺ, സാധു കൊച്ചുകുഞ്ഞ് ഉപദേശി എന്നിവരുടെ രചനകൾ ഉൾപ്പെടെയുള്ള മനോഹര ഗാനങ്ങൾ കെ.ജി. മാർക്കോസിനൊപ്പം പ്രശസ്ത പിന്നണി ഗായികയും, സ്റ്റാർ സിംഗർ ടി.വി. സംഗീത പരിപാടിയിലൂടെ ശ്രദ്ധേയയുമായ മെറിൻ ഗ്രിഗറി, യുവതലമുറയുടെ പ്രിയഗായിക ശ്രേയ എന്നിവർ ആലപിക്കും. ക്രിസ്തുവചനങ്ങളിൽ വിശ്വാസത്തെ ഉറപ്പിച്ച് സ്നേഹ, കാരുണ്യ പ്രവർത്തനങ്ങൾക്ക് നേതൃത്വം നല്കുന്ന “മൈ ചർച്ചി”ന്റെ സ്ഥാപകൻ എ.വി. തോമസ് പരിപാടിക്ക് ആമുഖ സന്ദേശം നല്കും.
നിത്യനൂതനമായ ഭക്തിഗാനങ്ങൾ അതേ ഭാവപൂർണിമയോടെ ആസ്വാദകരിലെത്തിക്കുന്നതിനായി ഏറ്റവും ആധുനികമായ പ്രൊഫഷണൽ സാങ്കേതിക സംവിധാനങ്ങളാണ് രക്ഷകന്റെ ഗീതം- സംഗീത സംഗമത്തിനായി ഒരുക്കിയിരിക്കുന്നത്.
പങ്കെടുക്കുന്നവർക്ക് പാർക്കിംഗ് സൗകര്യം ഒരുക്കിയിട്ടുണ്ട്. സൗജന്യ പാസുകൾ മുഖേനയായിരിക്കും രക്ഷകന്റെ ഗീതത്തിലേക്കുള്ള പ്രവേശനം. സൗജന്യ പാസുകൾക്കായി 97464 66440, 974641 14444 എന്നി മൊബൈൽ നമ്പറുകളിൽ വിളിക്കുക.
